रेल्वे प्रवासातील प्रवाशांना वेळेवर, स्वच्छ आणि दर्जेदार जेवण मिळवून देण्यासाठी IRCTC ने एक नवी डिजिटल सेवा सुरू केली आहे. आता मेल आणि एक्सप्रेस ट्रेनमधील प्रवाशांनाही त्यांच्या सीटवर गरमागरम जेवण मिळेल. पूर्वी ही सुविधा फक्त प्रीमियम ट्रेनसाठीच मर्यादित होती, मात्र आता ती सर्वसामान्य प्रवाशांसाठीही खुली करण्यात आली आहे.
ही सेवा मुख्यतः त्यांच्यासाठी उपयुक्त आहे, जे ट्रेन प्रवासादरम्यान जास्त दर, कमी दर्जाचे जेवण किंवा अनधिकृत विक्रेत्यांमुळे त्रास सहन करतात.
ई-पँट्री म्हणजे काय?
IRCTC कडून सुरू करण्यात आलेली ई-पँट्री सेवा म्हणजे एक डिजिटल जेवण बुकिंग प्लॅटफॉर्म आहे. या सुविधेद्वारे मेल आणि एक्सप्रेस ट्रेन्समधील प्रवाशांना त्यांच्या जागेवरच जेवण मिळते. Confirmed, RAC किंवा Partially Confirmed तिकिट असलेल्या प्रवाशांनाही ही सेवा उपलब्ध आहे. मात्र, ही सुविधा फक्त त्या ट्रेन्समध्येच उपलब्ध असेल ज्यात पँट्री कार असतील.
सेवा कशी वापरायची?
टप्पा 1 – तिकिट बुक करताना किंवा नंतर ‘बुक्ड तिकिट हिस्ट्री’ मध्ये जाऊन ई-पँट्री पर्याय निवडा.
टप्पा 2 – यानंतर Meal Verification Code (MVC) SMS किंवा ईमेलवर मिळेल.
टप्पा 3 – प्रवासाच्या दिवशी MVC कोड दाखवून तुमच्या सीटवर गरमागरम जेवण मिळेल.
ई-पँट्री सेवेमध्ये काय खास आहे?
- ऑनलाईन जेवण बुकिंग (वेबसाइट किंवा अ‍ॅपवरून)
- Standard Meal आणि Rail Neer यांची प्री-बुकिंग
- फक्त डिजिटल पेमेंट्स, कोणतीही रोख रक्कम नाही
- निश्चित दर, ओव्हरचार्जिंग नाही
- IRCTC मंजूर विक्रेत्यांकडून जेवण मिळेल
- MVC कोडच्या आधारे अचूक प्रवाशाला जेवण पुरवले जाईल
- ऑर्डरवर डिजिटल देखरेख आणि कर नियमांचे पालन
- जेवण न मिळाल्यास रिफंडची सोय, ज्याची माहिती SMS/Email/WhatsApp वर दिली जाईल
सेवा कधीपासून सुरू झाली?
या नव्या सुविधेची चाचणी भारतातील सर्वात लांब पल्ल्याच्या ट्रेन विवेक एक्सप्रेस (22503/04) मध्ये घेतली गेली. पुढील 60 दिवसांत आणखी 25 ट्रेनमध्ये (100 रॅक्स) ही सेवा लागू केली जाणार आहे. यशस्वी चाचणी नंतर ही सुविधा संपूर्ण देशभरातील मेल आणि एक्सप्रेस ट्रेनमध्ये टप्प्याटप्प्याने सुरू केली जाईल.